- طيب ماتحاول
- حاولت وفشلت
- بص انت بتتكلّم ازاى ؟! .. عمرك ما هتوصل لحاجة بالطريقة دي !
- ومين قال إني عايز أوصل لحاجة أصلا ؟ .. كل اللي بعمله دا كأنه خربشة على الحيطان , لو بقي حتى منها الصوت بس يبقى كويس .. إنما هنقعد نتكلّم عن تحقيق الذات والخرف دا يبقى الكلام مالوش لازمة .
- القطط بس هي اللي بتخربش على الحيطان .
- والفيران , والكلاب , والحمام .... ليه الانسان لأ ؟!
- والخربشة وصلتك لايه في الآخر ؟؟ ايه النتيجة ؟
- مابفكّرش في نتايج .. بس على الأقل هموت وأنا راضي عن نفسي .
- مش لايق عليك الدور دا .
- دور ايه ؟؟
- دور الفلاسفة الوجوديين اللي انت عايش فيه حاليا دا .
- ماتخافيش , معظم الوجوديين انتحروا , أنا حاليا أبعد ما يكون عن الانتحار .
- ......
- ماتكبّريش الموضوع .. كل الحكاية إني فعلا حاولت وفشلت زى ما قلت لك في الأول .. مش لازم بقى نقلبها جلسة تحليل نفسي .
- أصلها مش أول مرة .. وأكيد مش هتبقى آخر مرة .
- ربّك هيسهلّها .
- منتظم في صلاتك ؟
- أحيانا .. أسابيع بتعدّي عليّا مابصلّيش غير الجمعة بس , وأسابيع تانية بتعدّي بصلّي الفروض بالسنن والنوافل .
- ودا ليه ؟؟
- ماعرفش .
- طيب على الأقل اوعدني .
- بإيه ؟
- إنك .....
- ها ؟؟
- .......
- حاضر .. أوعدك .
No comments:
Post a Comment