زوايا مسارات الرصاص .

(1)

المشهد زى ما هو ..
مكررّ .. ممنهج ..
وبيقلب للون الاحمر ..
مع كل نفس في صدر بينهج ..
م الجري في أرجاء الميدان ..
وعلاج مصاب ..
وبطانية تحطّها على كتف بردان..
أو تكفّن بيها شهيد ..
سيّان ..
ماهو مفيش وقت للتفكير ..
أو إنك تقلع النضارة أو الماسك ..
أو تردد ورا الأدان ..
دلوقتي حدف طوب ..
ومولوتوف ..
مين أول جبان هيشعر بطعم الخوف ؟
مين أول واحد هيرجع ..
للصفوف الأخرانية ؟
هيستحق اللعن ..
والسب والشتيمة ..
مالكش قيمة ..
هنا..
بنشرح للعالم يعني ايه كلمة " ثوريّة " ..

(2)

انت الدرع ..
انت الدرع اللي حمى البلد ..
انت سيف وصولجان ..
وعرش ..
ووتد ..
انت الولد ..
اللي راح ومش خايف ..
وحالف ..
ليكون آخر يوم في عمري ..
يوم ما انسى الهتافات ..
حاسب ..
موتوسيكلات ؟
وليه العجب ؟
أصل في شهيد جديد وقع ..
وروحه لسّه بترقص ..
على نَغَم الطلقات
اللي بتنطلّق جوّه  ..
. . .
ولسّه ..المشهد بيتكرر زى ما هو ..

(3)

مين قال العيون راحت هدر ؟!
  مين قال النسور راح تنتصر ؟
نسور على اكتافهم ..
ملعونة في كل كتاب ..
ونسور تطير .. ترفرف ..
في أعلى الميدان ..
وتنزل تدب الرعب .. في قلوب الكلاب ..
كام واحد فينا عاش ؟
كام واحد فينا مات ؟
كام واحد فينا شاف الغاز حواليه ..
كما الضباب ؟
كام واحد فينا شال صاحبه وهو منصاب ؟
كام واحد زار أم شهيد ..
ودارى شهادة وفاته ورا الباب ؟
كام واحد نزل يقول كلمة " كفاية " ؟
كام واحد بقِي على القضية ..
والمبدأ ..
ولسّاه بيحلف :
مش هى دي النهاية ..

(4)

مين قال الثورجة مش بالكلام ؟
اسمع اذاعة .. وافتح قناة ..
هتلاقي عجب الكلام ..
ونوم اللئام ..
وناس رايحة تهتف ..
لحمامة السلام..
وناس شايلة قرابين ..
مدبوحة ..
على مذبح الدين ..
ومذهب الإمام ..
هتلاقي ناس بتصرخ : ارجعوا ..
انتو اللي .. واللي .. واللي..
انتو المأجورين ..
أعداء السلام اللي شايلين السلاح ..
صاحبي اللي كان ..
التفت وقالّي :
احنا المأجورين ..
لو كانوا همّا أصحاب الكلام المباح ..

يا شهرزادات العصر ..
والأوان ..
اخرسوا ..
مالكوش أمان .. مالكوش ضمان ..
في إله هيقول ..
مين فينا اللي صح ..
ومين غلطان ..

(5)

وبفكّرك..
احفظ أسامي اللي ماتوا في الشوارع صم ..
حقهم محفوظ, دم يقابله دم ..
يا ثوار المرحلة ..
استعملوا البرجل .. والمنقلة ..
واحسبوا زوايا مسارات الرصاص ..
وامسحوا العماص ..
عن عيون نسيت .. أو قرّبت ..
تنسى ..
إن احنا طالبين القصاص ..